Arestado ang isa ka escapee nga may kaso nga rape kag child abuse matapos nga ginserbehan sang Warrant of Arrest sa Barangay Caliling, Cauayan, Negros Occidental.
Sa inteview sang Bombo Radyo Bacolod kay Police Lt. Col. Salvador Trono Jr., Chief of Police sang Talisay City Police Station, ang nadakpan ang ginkilala kay Arnel Ocaña, residente sang Sitio Mambukano, Brgy. Cabatangan, Talisay City, Negros Occidental.
Suno kay Trono, una na nga naaresto sa Mandaue City Police Office bangud ini ang number 1 Most Wanted Person.
Dugang pa sini nga nadakpan man si Ocaña sang Talisay City Police Station sang April 2022 apang nakapalagyo sang May 2022 sa kustodiya sang nasambit nga police station.
Matapos sadto, naghulog liwat sang warrant of arrest ang Mandaue City court kag ginmanduan ang Talisay City Police Station nga arestuhon si Ocania.
Bangud sini nagpatigayon sang surveillance ang mga kapulisan sa ciudad sang Talisay kun sa diin natumod ang lugar nga ginapanaguan sini.
Nagpatigayon naman sang proper coordination ang mga kapulisan kag natigayon nga madakpan si Ocania sa Brgy. Caliling, Cauayan, Negros Occidental.
Ang arestado nakahunong na sa Talisay City Police Station kag nagapangatubang sang kaso nga rape, wala sang ginrekomendar nga piyansa kag paglapas sa Section 5 (B), sang R.A. 7610 nga may ginrekomendar nga piyansa nga Php 200,000 nga gin-issue ni Hon. Maria Dee A. Seares, Presiding Judge sang Family Court, Branch 6, 7th Judicial Region, Mandaue City, Cebu sadtong June 8, 2022.
