Nagsanyog na bilang isa ka Bagyo ang ginamonitor nga Low Pressure Area sa sulod sang Philippine Area of Responsibility alas-2:00 kaina sang kaagahon.
Ini ang ginhatagan sang local name nga Tropical Depression “BISING”.
Alas-5:00 subong nga aga, ulihi nga nasiplatan ang Bagyo Bising sa 200 km West Northwest sang Calayan, Cagayan.
Dala sini ang kabaskugon sang hangin nga nagadangat sa 45 km/h kag pagmadlos nga tubtob 55 km/h.
Ang Bagyo ang nagahulag sa Southwestward nga dereksyon sa kadasigon nga 20 km/h.
Ginpaidalom naman sa Tropical Cyclone Wind Signal No. 1 ang nakatungdan nga bahin sang Babuyan Islands, kag northwestern portions sang Ilocos Norte, nga magatuga sang mabaskog nga ulan nga may kaupod nga mabaskog nga huyop sang hangin.
Mabatyagan man ang lapta-lapta nga mga pag-ulan sa Apayao, Kalinga, Abra, Batanes, kag mainland Cagayan bangod sa Bagyo.
Samtang mahimo naman magtuga sang dugay-dugay nga pag-ulan ang Southwest Monsoon ukon Hangin Habagat sa Metro Manila, Pampanga, Tarlac, Bulacan, Zambales, Bataan, Cavite, Batangas, Occidental Mindoro, kag nabilin nga bahin sang Ilocos Region kag Cordillera Administrative Region.
Lapta-lapta nga mga pag-ulan man ang mabatyagan sa Visayas, Dinagat Islands, Surigao del Norte, kag nabilin nga bahin sang Luzon bangod gihapon sa Habagat.
Samtang apisar sa epekto sang Habagat, mangin makanay naman ang panahon sa nabilin nga bahin sang pungsod magluwas sa mga tumalagsahon nga mga pag-ulan ukon thunderstorms.
Padayun nga ginapahanumdom sa mga pumuluyo ang doble nga paghalong bangod sa mataas nga tyansa sang mga pagbaha ukon landslide sa tion sang pagbubo sang mabaskog nga ulan.
Sa atun latest forecast, ang Tropical Depression Bising ang ginalauman nga magapadayun sa mahinay nga paghulag padulong sa nakatungdan nga dereksyon sa masunod nga 12 oras kag gilayon man nga magagwa sa PAR.
Kasunod sini magaliko sa northeastward nga dereksyon ang Bagyo kag mahimo liwat nga magsulod sa nakatungdan nga boundary sang PAR sa Domingo.
Wala naman ginadula ang posibilidad nga sa liwat nga pagsulod sa PAR, ini ang magaresulta sa pagpaidalom sa Batanes kag Babuyan Islands sa Tropical Cyclone Wind Signal No. 2.
Yara man ang posibilidad nga sa Sabado sang hapon ukon sa gab-i, magabaskog pa ang bagyo kag mangin Tropical Storm category samtang ini ang padulong sa nabagatnan nga kadgatan sang Taiwan.
