Wala na nakibot si former Magdalo Partylist Representative Gary Alejano sa mga rebelasyon batok sa war on drugs sang administrasyon ni former President Rodrigo Duterte.
Sa interview sang Bombo Radyo Bacolod sa anay kongresista, sadto paman ginalauman na sini nga magaligwat ang witnesses batok sa mga makabig sentro sang war on drugs.
Paathag ni Alejano nga ang panibag-o nga rebelasyon ang nalakip na sa ila nga complaint sa International Criminal Court.
Suno diri, madugay na nila nahibaluan ang nahanungod sa listahan sang mga drug personalities kag ang nahanungod sa reward para sa mga mapatay nga drug dealer ukon user.
Ginakalipay sang mga ini nga nagpagwa sang dugang nga statement nga nagapamatuod sa ila ginapakigbato.
Ini ang dako nga butang para sa paghatag sang hustisya sa mga biktima partikular na ang mga inosente.
Aminado si Alejano nga wala sang nagapangisog nga maghatag sang testimoniya sang panahon sang Duterte Administration magluwas sa pipila lamang ka grupo kaangay nila ni Former Senator Antonio Trillanes IV.
Dugang pa sini nga ginalantaw pa nila kun may-ara sang public policy may kaangtanan sa Extra Judicial Killings.
Suno diri, nagagwa nga may-ara sang sistema sa EJK kag indi nga basta na lamang natabo, bangod natumod nga ini ang nakasunod sa model sang Davao Death Squad nga na-implementar sa national level.
Ini ang kinahanglan sang ICC bilang pamatuod sang crime against humanity, agud makapagwa sang warrant of arrest.
Panindugan ni Alejano nga kaangay sa kadam-an, kontra man sang mga ini ang illegal nga droga apang ini ang dapat nakasunod sa democratic process.
Suno diri, ang Philippine National Police ang haligi sang democratic institution, gani importante nga malimpyuhan ang ila nga hanay.
Panindugan sini nga indi nagakaangay sa PNP personnel nga madasig sa pagpitik sang gatilyo ukon nagashortcut imbes nga maglabay sa nagakaigo nga proseso.
Nahanungod sa reward sa makapatag sang drug personalities, ginalantaw ni Alejano nga ang kwarta ang gikan sa Philippine Offshore and Gaming Operators.
Ginalantaw sini nga makaupod sa mapasakaan sang kaso ang accomplice kaangay nanday Senators’ Bong Go kag Ronald “Bato” Dela Rosa nga anay PNP Chief sa Duterte Administration.
