Patay ang anay Punong Barangay sa Barangay Bi-ao, Binalbagan matapos aksidente nga makabunggo ang ginadala nga motorsiklo sa isa ka salakyan sa National Highway sang Barangay Paglaum sa nasambitan nga banwa alas-8:35 sang gab-i sang Lunes.
Sa interview sang Bombo Radyo Bacolod kay Police Lt. Glen Portunes, deputy chief of police sa Binalbagan Municipal Police Station, ang biktima ang ginkilala nga si Felizardo Aguillon, 72 anyos, ang nahibaluan nga nagamaneho sang pula nga Honda CRF 150 gikan sa norte padulong sa sur nga dereksyon.
Apang pagdangat sa nasambitan nga highway, sang magaliko kuntani si Aguillon sa isa ka bangga, aksidente sini nga nabungguan ang likod nga bahin sang Nissan Navarra nga ginamaneho ni Jose Erasmo, 63 anyos, residente sa Carmen Street, Barangay San Pedro, Binalbagan.
Suno kay Portunes, bangod madasig ang dalagan sang anay Punong Barangay, natumba ang motorsiklo sini bangod sa impact kag nalampos ang ulo sini sa semento.
Gindala pa sa Binalbagan Infirmary ang biktima, kag ginrefer sa ospital sa ciudad sang Bacolod, apang ang biktima ang nadulaan sang kabuhi alas-2:30 kahapon sang kaagahon.
Sa karun ginahulat pa sang kapulisan ang desisyon sang pamilya sang biktima kun sila ang magapasaka sang kaso.
