BACOLOD CITY – Ginapanawagan sang grupo nga National Union of Journalists of the Philippines (NUJP) ang pagpanaog sa pwesto ni Presidential Communications Secretary Martin Andanar.
Ini ang kasunod sang pahayag ni Andanar nga nagbaton sang isa ka libo ka dolyar ang mga katapo sang media nga nag-cover sang press conference ni Retired SPO3 Arthur Lascañas kun sa diin ginpamatud-an sini ang pahayag ni Edgar Matobato nga may yara gid man sang Davao Death Squad (DDS) nga ginapanguluhan ni Presidente Rodrigo Duterte sadtong ini ang alkalde pa lamang sang ciudad sang Davao.
Sa exclusive interview sang Bombo Radyo kay NUJP Director Nonoy Espina, ginpahayag sini nga kun indi man lang mapamatud-an ni Andanar ang alegasyon sini, mas maayo nga magpanaog na lamang ini sa puwesto sa baylo nga magpatu-pato kag magpati sa mga tsismis.
Ginaduso man ni Espina ang pagpasaka sang kaso nga libelo batok kay Andanar matapos nga nahuy-an ang mga inosente nga katapo sang media nga nagatuman lamang sang obligasyon nga magdul-ong sang balita sa publiko.
