Angeline Quinto, malapit na nga makatapos sa kolehiyo

Malipayon nga ginpakigbahin sang singer-actress nga si Angeline Quinto nga malapit na ini nga makatapos sa kolehiyo sini nga bulan sang June, 2026.

Ang bag-o nga achievement ang ginasikreto kuntani ni Angeline sa iya asawa nga si Nonrev Daquina kag sa pamilya sini, apang gintamyaw ini sa isa ka event nga iya gintambungan.

Suno kay Angeline, nagkuha ini sang kurso nga Business Management, Major in Marketing sa Immaculada Concepcion College.

Ang pagtuon sang kolehiyo ang nangin pagpanghangkat kay Angeline bangud kinahanglan sini nga balansehon ang iya oras sa iya pamilya, pagtuon kag sa iya singing career.

Apang pahayag sang singer, nangin madinalag-on man ini kag maga-graduate na siya kaupod ang Batch 2026.