Apektado man ang ekonomiya sang Kuwait bangod sa nagapadayun nga gyera sa Middle East.
Sa interview sang Bombo Radyo Bacolod kay John Randolph Rubin, Bombo International News Correspondent derekta sa Kuwait, wala nagsaka ang presyo sang gatong sa nasambit nga pungsod, kun sa diin ang ulihi nga pagsaka sang fuel prices ang natabo sang 2016 pa.
Apang apektado gihapon ang ekonomiya bangod sila ang oil expoting country, kag ini ang nagapanguna nila nga produkto.
Bangod sa pagsarado sang Strait of Hormuz, indi na makabaligya sang langis ang Kuwait sa iban nga pungsod.
Ang Kuwait ang nagabaligya sadto sang 2.5 million tubtob 2.6 million barrels sang crude oil kada adlaw, kag ang magenerate sini nga income ang nagadangat sa $275 million.
Suno kay Rubin, ginpanubuan na ang fuel production sa pungsod, kag sila ang nagapagwa na lamang sang makaigo para sa local consumption.
Dugang pa nga naka-apekto sa ekonomiya ang kabudlayan sa pagpasulod sang imported products.
Suno kay Rubin, 90 porsyento sang mga baligya sa Kuwait ang gina-import gikan sa iban nga pungsod.
Bangod sa gyera, madamo sang mga brands nga mabakal sadto sa mga merkado ang indi na makita.
May nagasulod paman nga supply apang ini ang nagalabay sa Saudi Arabia kag border sang Iraq, nga may mas mahal nga transportation cost, gani nagadako man ang presyo sa pagbaligya.
