BACOLOD CITY — Igapatawag sang Sangguniang Panlalawigan si Provincial Veterinarian Dr. Renante Decena sa session sa masunod nga semana agud magpaalinton sang mga tikang sang probinsiya agud malikawan ang bird flu sa Negros Occidental.
Sa session sang provincial board kahapon nga adlaw, napasar ang resolusyon nga nagapatawag kay Dr. Decena agud mapahibalo ang mga ginahimo sang provincial government agud indi makasulod ang H5N1 ukon bird flu virus nga nagapanghalit sa mga manok kag pato sa Luzon, partikular sa probinsiya sang Pampanga.
Suno kay Board Member Salvador Escalante, tuman ka malahalon nga indi makasulod ang kagaw nga nagatuga sang bird flu paagi sa kontaminado nga poultry products kasubong sang karne kag itlog sang manok ukon pato.
Nahibaluan nga sa exclusive interview sang Bombo Radyo kay Dr. Decena, ginpasiguro sini nga hilway pa sa bird flu ang probinsiya matapos ang ginpatigayon nga sampling sang tinalikdan nga Abril.
Hugot man nga ginadumili ang pagsulod sang poultry products gikan sa Luzon matapos ini gindumili sang Bureau of Animal Industry.
