Ginbalik anay sang Sangguniang Panlungsod sa Bacolod sa Brgy. Handumanan ang ginpasar nila nga “Anti-Tsismis Ordinance” agud nga athagon ang pila ka probisyon sini.
Suno kay Councilor Renecito Novero, ang presiding officer sang Sangguniang Panlungsod, luyag nila anay nga athagon sang barangay council sang Handumanan ang Barangay Ordinance 2019-09-06 nga ila ginpasar sang September 10, 2019.
Suno kay Novero, may yara naman nga daan sang Presidential Decree sa tion anay ni former President Ferdinand Marcos kag Revised Penal Code nga nagadagdag sang penalidad sa mga nagapalapta sang tsismis ukon kutso-kutso.
Ginpahayag ni Novero nga kun mahitso na sang barangay, aprubahan man sang city council ang nasambit nga ordinansa.
Samtang indi naman makahatag sang komento si Association of Barangay Captains (ABC) Bacolod Chapter President Lady Gles Gonzales-Palen kun makabulig gid man ang ordinansa sa pagtapna sang kutso-kutso sa barangay.
Apang suno kay Gonzales-Palen, kapin sa 80% sang mga reklamo nga ginabaton sang Katarungang Pambarangay amo ang tsismis ukon unjust vexation.
