Gikutkut ang apat ka bangkay sa tatlo ka patyo sa pagpangita sa isa ka nadula nga detainee sang Bacolod Police Station 8.
Sa interview sang Bombo Radyo Bacolod kay Police Lt. Col. Joery Puerto, pinuno sang City Operation and Management Unit sang Bacolod City Police Office, sadto sang siya pa ang station commander sang Bacolod Police Station 8, nadakpan si Henry V. Tayo, Jr. sa kaso nga pagpangawat sang Setyembre 2022.
Suno diri, narekober halin kay Tayo ang mga ginkawat sini apang bangod wala man nagpasaka sang kaso ang biktima nga ginkawatan, ginrelease nila si Tayo matapos ang reglementary period.
Apang, matapos marelease wala na ini nakapauli.
Nagpalapit ang pamilya Tayo sa Regional Trial Court kag nagfile sang petisyon para sa writ of amparo.
Ginpangayuan sang RTC ang Bacolod Police station 8 sang ebidensya sa pagrelease ni Tayo kag naghatag man ang estasyon sang video nga nagaperma ini sa release logbook.
Kasunod sini, ginbasura sang RCT ang privilege of the writ of Amparo, apang nagpasa naman sang petition ang pamilya Tayo sa Supreme Court.
Didto na kag gingrant sang SC ang privilege of the writ of Amparo kag ang tikang sa karun nga ginhimo amo ang pagkutkut sa apat ka unidentified nga mga bangkay nga ginlubong.
Suno kay Puerto, may gin-exhume nga isa ka bangkay sa Bago City, duha sa Murcia Municipaity kag isa sa Brgy Handumanan, Bacolod City.
Igamatch sa karun ang nakuha nga sample sa mga bangkay kag sa pamilya Tayo agud mahibaluan kun isa sa mga bangkay ang nadula nga si Henry Tayo.
