Ginpanawagan sang isa ka asawa sa naghit-and-run sa iya bana sa Asinan, Barangay Bagonawa, San Enrique, Negros Occidental sang Marso 14, nga sila ang mabuligan sa pagpabulong sa biktima.
Sa interview sang Bombo Radyo Bacolod kay Myca Gonzales, asawa sang biktima nga si John Mark Gonzales, ang iya nga bana ang gikan sa nasambitan nga banwa kag nagalakaton sa dalan papuli kuntani sa Purok San Nicolas, Barangay Sagasa, Bago City.
Apang pagdangat sa nasambitan nga lugar kapin alas-3:00 sang kaagahon, apisar nga four lanes ang dalan, ang iya nga bana ang hinali nga nabungguan sa likod gani ini ang naglabog sa kalog.
Sa CCTV footage sa Barangay Sibucao, San Enrique, may nakita nga itom nga Nissan Navarra nga madasig nga naglabay, sa halos kasunod lamang nga oras sang natabo ang insidente, apang indi naman maseguro kun amo ang nakabunggo sa biktima.
Apang nagbutlak na ang adlaw antes nakapadulong sa La Carlota City Hospital matapos mabuligan sang isa ka apa.
Ini ang ginrefer sa Corazon Locsin Montelibano Memorial Regional Hospital agud mabulong ang iya nga fracture sa batiis.
Apang nagfocus lamang sa fracture sa batiis ang mga doktor, samtang sang Marso 15, didto na nagareklamo sa kasakit sang ulo ang iya bana.
Ini ang ginpahibalo man sa nurse sa ospital apang ginpahayag nga mahimo epekto lamang sang bulong.
Matapos madischarge, ang biktima ang ginbagang sang hilanat, nagawaras kag indi na mahangpan ang ginapangwakal, gani ini ang ila naman nga gindala sa Bago City Hospital.
Suno kay Myca, sang maglabog ang iya bana sa kalog, nakabunggo ang ulo sini sa bato.
Irefer ini kuntani sa Regional Hospital apang sila ang yara na sa waiting list, apang pahayag naman sang doktor sa Bago City Hospital nga kinahanglan nagid nga masulod sa Intensive Care Unit (ICU) ang biktima.
Ini ang gintakdan na lamang sang oxygen bangod nagalagas na lamang sa pangginhawa, kun sa diin ginsuhestyon sa pamilya nga dal-on sa pribado nga ospital nga may bakante.
Apisar wala sang dala nga kwarta sila ang nagpadulong sa Queen of Mercy Hospital, kun sa diin ginpahayag sang doktor nga kinahanglan sang P100,000 agud ma-operahan sa ulo ang biktima.
Sang ginbuksan ang iya skull, nakita nga nagahabok ang bahin sang iya nga utok kay may-ara na sang bleeding.
Ginapakamaayo naman sini nga naayo ang ospital kag nagsugot nga P50,000 anay ang ibayad, kag natigayon ang operasyon Marso 17 sang gab-i.
Bisan ang doktor ang nagapahayag nga himala na lamang nga nabuhi ang iya nga bana.
Apang apisar nga nakapangayo sila sang bulig sa mga government agencies agud mabayaran ang ospital, indi pa marelease sa ospital ang iya bana, bangod wala pa mabayaran ang physician fee nga nagdangat sa P324,700.
Panawagan ni Myca sa nakabunggo sa iya nga bana, nga kuntani konsensyahon kag magbulig agud makagwa na sa ospital ang iya bana.
Sarang naman makig-angot sa San Enrique Municipal Police Station ang suspetsado, ukon mahimo man magcontact sa iya sa numero 09919083212.
