BACOLOD CITY — Nangin madinalag-on ang Negrense team sa juniors division batok sa Singapore sa una nga adlaw sang hinampang sa Asia Pacific Little League Softball Championship sa Dover, Singapore.
Suno kay coach Tony Oquindo nga kaupod sang delegasyon sang Pilipinas sa Singapore, daog ang Pilipinas kontra sa host country sa score nga 17-0, Biyernes sang hapon.
Ang hampang kontra Singapore alas-2:00 kahapon sang hapon ang ikaduha sang Pilipinas bangud ang first game sang aga kontra Australia ang gin-postpone bangud sang mabaskog sang ulan.
Subong nga aga i-resume ang hampang sa tunga sang Pilipinas kag Australia.
Suno kay Oquindo, isa gid sa factor sang kadalag-an sang mga Negrense players nga tiglawas sang Pilipinas amo ang maayo nga training kag subong man sa suporta sang Department of Education.
Magluwas sa duha ka Negrense team nga amo ang majors division kag juniors division may duha man ka Pilipino nga nagabida sa court indi bilang players kundi bilang umpires.
Ang duha ka Filipino umpires sa Asia Pacific Little League Softball Championship amo sanday Rodito Badjan kag Danilo Esmany.
Si Badjan ang residente sang ciudad sang Silay kag officer in-charge sang Doña Monserat Lopez National High School.
Tuman naman ang pagpasalamat sini sa exposure nga nahatag sa iya sa nasambit nga torneyo.
