Daku ang pasalamat ni Coach Adriana “Addy” Arca matapos maangkon sang runner sini nga si Bernalyn Bejoy ang silver medal sa 800-meter run sa nagapadayon nga 12th Southeast Asian Youth Games sa ciudad sang Ilagan, probinsiya sang Isabela.
Sa exclusive interview sang Bombo Radyo Bacolod kay Coach Addy, ginpahayag sini nga daku ang pasalamat sang team sini, nga nagatiglawas sang Pilipinas sa patag sang Athletics, para sa pangamuyo para sa ila kadalag-an.
Gindayaw man ni Coach Addy ang nangin performance ni Bernalyn bangud natapos sa close fight ang una nga event nga ila ginpasakupan subong nga adlaw sa diin nakontra sang atleta ang taga-Vietnam nga tuman lamang kagamay ang abanse sa iya.
Nahibaluan nga gintinguhaan ni Bernalyn nga maka-overtake sa Vietnamese apang wala ini nakatigayon.
Sa pihak sini, si Bernalyn Bejoy nga tumandok sang Barangay Estefania kag estudyante sang Romanito Maravilla National High School ang pinakauna nga silver medalist nga babayi sang Pilipinas sa 12th SEA Youth Games.
Samtang, ginbuyagyag naman ni Bejoy ang rason kun ngaa wala sini maangkon ang bulawan nga medalya sa 800-meter run sa 12th Southeast Asian Youth Games kaina sang aga.
Ginpahayag sang 16-anyos nga si Bernalyn nga yara ang pamulanon sini kag may yara man ini sang injury sa nawala niya nga tuhod tuga sang iya pag-practice antes ang hinampang.
Amu na lamang ang iya pagkanugon bangud sa ulihi nga 100 meters lamang nakalabaw sa iya ang player sang pungsod Vietnam nga amo ang nangin gold medalist.
Nagapati ang atleta nga kun wala ang mga sablag sa iya lawas, siya gid ang igadeklarar nga tagdaog.
Sa pihak sini, malipayon naman si Bernalyn nga iya nalapawan ang iya nga personal best ukon pinakamadasig sini nga pagdalagan.
