BACOLOD CITY – Nagapanawagan ang isa ka certified dog lover sang bulig sa mga maluyag mag-adopt ukon mag donar sang lugar nga maistaran sang masobra 60 ka mga ido nga gin adopt sini gikan sa Bacolod City Dog Pound sa Alunan, Brgy. 35.
Nangin viral sa facebook ang post ni Cherry Mae Herrera, 37-anyos sang Brgy. Mansilingan, kun sa diin makit-an ang mga ido nga naga ginutok sa Dog Pound nga natalana na kuntani nga pamatyon bangud nga wala sang maga kuha sa mga ini.
Nahibaluan nga may patakaran ang dog pound nga ang mga stray ukon layaw nga ido nga ila madakop ang gina pamatay matapos ang pila ka adlaw kun wala sang maga adoptar sa mga ini.
Nagligad nga semana nakalab-ot sa dog pound si Herrera matapos nga gin pangita sini ang isa sa mga ido nga iya gina pakaon sa guwa sang ila balay kag diri iya nakit-an ang kahimtangan sang nasambit nga mga sapat.
Diri una siya nag adoptar sang 13 ka bilog apang nagakahangawa ini sa madangatan sang nag kalabilin gani nag tinguha ini nga madoptar man ang mga ini.
Nagbayad na ini sang 9 mil pesos kun sa diin naga balor sang 100 ang adoption para sa isa ka ido kag dugang nga tag 50 pesos para sa vaccine sang mga ini.
Sa karun naga problema si Herrera kun diin ibutang ang nasambit nga mga ido kun pahalinon na ang mga ini sa puluy-an sang isa ka volunteer sa isa ka subdivision sa Brgy. Pahanocoy.
Sa mga maluyag mag adoptar ukon magbulig kay Herrera agud nga mahatagan sang ilistaran ang nasambit nga mga ido mahimo lamang ini nga kontakon sa iya numero 09498087784.
