Patay ang 38 anyos nga babayi nga barker sang jeep matapos ginluthang sa Purok Lubi, Barangay 3, Bacolod City kaina sang kaagahon.
Sa interview sang Bombo Radyo Bacolod kay Jemar Mercado, nagabaligya sa tiyangge, ang biktima nga ginkilala nga si Mary Jane Co ang nagbakal sa iya sang gatas kapin alas-10:00 kagab-i, kag nagbalik sang kaagahon agud magbayad sa kulang nga P4.
Kapin alas-3:30 sang kaagahon, samtang siya ang nagalantaw sa isa ka babayi nga ginabuligan pasakay sa tricycle bangod hinali na lamang nga ginkurog, didto naman natabo ang pagpangluthang.
Suno diri, siya ang nakabati sa duha ka lupok sang armas-luthang.
Dugang pa sini nga duha ang suspect kag lunsay nakajacket kag may tabon nga itom ang nawong.
Indi man sini segurado kun may motorsiklo ang mga ini bangod nagalakat lamang sang iya makit-an.
Suno diri, kapin duha ka semana naman nga nagabakal-bakal sa ginabantayan nga tiyange ang biktima, kag maayo man ang pagkakilala sini bangod nagabayad gid kun may kulang sa kwarta.
Samtang wala na sini mahibaluan kun ano ang natabo sa babayi nga ginakurog bangod siya ang nagdalagan man sang matabo ang shooting incident.
Sa pihak nga bahin, Ginpahayag sang bana sang babayi nga ginluthang patay sa Purok Lubi, Barangay 3, Bacolod City kaina sang kaagahon nga may van nga nagtaban sa iya asawa kagab-i apang ginpapauli man.
Sa interview sang Bombo Radyo Bacolod kay Dominador Giganto, ang iya asawa nga si Mary Jane Co, 38 anyos, ang tumandok sa Dumaguete kag sila ang may duha ka kabataan nga pito kag walo ka tuig.
Siya ang nagahampang sa computer shop sang ginpahibalo sa natabo nga pagpangluthang.
Suno diri, siya ang nagsunod sa iya asawa agud kuntani ini ang sugaton bangod nabiyaan ang duha nila ka bata sa Man Plaza, Barangay 5.
Paathag sini nga siya ang residente sang Barangay Granada, apang bangod sila nga mag-asawa ang nagatrabaho bilang barker sang jeep sa Man Plaza, nag-ayo sila sa tag-iya nga didto na lamang magtulog.
Ginpahayag sini nga alas-5:00 kahapon sang hapon sa atubang sang PhilHealth, may itom nga Toyota Innova nga nagdulog samtang nagabarker ang iya asawa kag ini ang ginpasulod sa van upod sa duha ka lalaki nga barker.
Duha ka dalagko nga lalaki suno diri ang nagkuha sa mga biktima.
Apang ang asawa sini kag duha ka iban pa ang ginpapauli man sang gab-i.
Ginalantaw sini nga mahimo may kaakig sa iya asawa ang may kahimuan sang krimen bangod ini ang masakit kun maghambal.
