Ginpatigayon na ang ceremonial signing sang Memorandum of Agreement para sa paghost sang Bacolod City sang Batang Pinoy 2026 sa Disyembre.
Sa iya nga speech, ginpasalamatan ni Bacolod City Mayor sanday Philippine Sports Commission chairperson Patrick Gregorio kag PSC Commissioner Olivia “Bong” Coo, sa paghatag sang kahigayunan sa ciudad nga maghost sang pahampang.
Suno kay Mayor Greg, nakasugilanon sini sadto ang mga opisyal nga iya pa nga ginpangayuan sang advice sa kun paano mapasanyog ang turismo.
Isa sa nangin topiko ang sports-tourism.
Nagalaom si Mayor Greg nga ang paghost sang Batang Pinoy 2026 ang makahatag sang dako nga benepisyo sa ekonomiya.
Nahibaluan nga ginpanubuan ang age-limit sang makapasakop sa Batang Pinoy sa walo ka tuig, kag ang mga kabataan ang masami gina-updan pagid sang ila nga mga himata.
Gani ginapatihan nga mas dako ang numero sang mga tumalan-aw gikan sa iban nga mga rehiyon, nga mahimo magdangat sa 15,000.
Kadungan sini, mahimo mapakilala sa mga bisita ang bugal sang Bacolod City kaangay sang inasal nga manok, kag iban pa.
Suno kay Mayor Greg, sang 1970s kag 80s, kilala ang Negros Occidental kag Bacolod City sa patag sang nagkalainlain nga sports kaangay sang baseball, softball, basketball, boxing, kag iban.
Ini ang luyag sang alkalde nga mabalik, gani siya ang nagahatag gid sang suporta sa mga atleta.
Ginalantaw sini nga may mga National athletes kag mga scouts nga magabisita sa hinampang, samtang handom man sang alkalde nga makaproduce ang Bacolod City sang masunod nga Olympian.
