Patay ang driver sang motorsiklo matapos makabunggo sa ginasundan nga trailer truck nga hinali nga nagdulog sa National Highway sang Prk Daisy, Brgy Calumangan, Bago City, Negros Occidental sang Sabado sang kaagahon.
Ang biktima ang ginkilala nga si Wendel Montaño, babayi, residente sang Prk Mahirup, Brgy Busay, Bago City.
Sa imbestigasyon sang Bago City Police Station, si Montaño nga nagamaneho sang puti nga Yamaha Nmax nga motorsiklo ang nagasunod sa Mitsubishi Fuso trailer truck nga ginamaneho ni Arjay Magbanua, 35 anyos, single, residente sang Prk Santan, Brgy Payao, Binalbagan.
Ang motorsiklo kag trailer truck ang lunsay nagabyahe gikan sa Bacolod City padulong sa ciudad sang Bago, sang hinali nga nagpundo ang trailer truck sa outer lane sang highway.
Bangod sini, wala nakapangaman ang driver sang motorsiklo kag nakabunggo sa buli sang trailer truck.
Tuga sang mabaskog nga impact, nag-agom sang malala nga samad ang biktima, nga ginhingagaw pa dala sa Bago City Hospital apang gindeklarar nga dead on arrival.
