Pilason ang isa ka babayi nga gina-alegar may deperensya sa paminsaron matapos aksidente nga nabungguan sang motorsiklo nga ginadala sang isa ka pulis sa Bangga Subay, Brgy Mandalagan, Bacolod City kapin alas-4:00 kaina sang kaagahon.
Ang driver nga Police Senior Master Sergeant kag assigned sa Regional Police Security and Protection Unit, ang padulong sa Police Regional Office – Negros Island Region para makatambong sa flag raising ceremony.
Apang pagdangat sa lugar, gina-alegar nga wala sini natalupangdan ang pagtabok sang babayi gikan sa simbahan, bangod sa moist nga nagapalasaw sa visibility sang iya nga helmet bangod sa ulan.
Pahayag sang mga nakakita nga hustuhan lamang ang kadasigon sang dalagan sang motorsiklo.
Samtang ang biktima ang nagabitbit sang sako, nga suno sa mga pumuluyo masami man nga nagalibot-libot sa lugar, kag ginalantaw nga may deperensya sa paminsaron.
Conscious man ang biktima, apang ini ang nag-agom sang bukol sa ulo, kag pilas sa kilid.
Ang biktima ang nakasuksok sang maong nga shorts, kag red, black and white nga checkered long-sleeves.
Sang siya ang isaylo sang rescue team, ini ang nagpahayag pa nga siya nalang ang makadto kag mabutang sang iya kaugalingon sa stretcher.
Sa paghinun-anon sang Bombo News Team sa biktima, pahayag sini nga siya ang residente sang Brgy Lantad, Silay City.
Apang sang ginpamangkot sang pangalan, nagpakilala ini nga Pilar, apang damo damo na sang ginmensyonar nga apelyido.
Samtang nadula naman ang cellphone sang pulis.
Nagapati ini nga nagtabog ang iya cellphone bangod sa aksidente, kag mahimo may nakapulot bangod madamo sang tawo nga nagpalapit.
Gintestingan man nga tawgan ang iya cellphone, apang naga-ring lamang kag wala sang may nagasabat.
Sa nakakilala ukon himata sang biktima, ini ang sa karun ginabulong sa Corazon Locsin Montelibano Memorial Regional Hospital.
