Nagakadapat lamang nga makita sa mga pulis ang fit nga mga lawas, kag may-ara sang regular nga exercise, kaangay sang push up kag iban pa, agud mas mangin epektibo sa pagserbisyo.
Apang bilang babayi nga pulis, pila ka pull-ups ayhan ang masarangan?
Ginkilala sang Guiness World Records ang 32-anyos nga si Jade Henderson, isa ka pulis halin sa Australia matapos makakuha sang 733 pull-ups sa sulod sang isa ka oras.
Nalapawan ni Henderson ang 725 pull-ups Guinness World Record ni Eva Clarke sang 2016 nga para sa iya, nagpamatuod nga ang kusog indi lang sa pisikal nga abilidad kundi sa mental kag emosyonal nga kabakod man.
Bisan pa nga nakabatyag siya sang bicep tear samtang naga-training, wala siya nagpasugot nga mangin kabangdanan ini sang iya pag-untat.
Apang ginhimo niya ini bilang inspirasyon kag nagbalik nga mas mabakod agud malab-ot ang dugay na niya nga handum.
Suno kay Henderson, ang rekord ang indi lang sa bahin sang numero kundi pamatuod man sang indi matupongan nga pagpangabudlay sang isa ka babayi nga nagapakita sang determinasyon kag inspirasyon sang tanan.
