Masobra sa P9 million nga balor sang suspected shabu ang narecover sang Bacolod Police Station 8 sa isa ka babayi nga residente sang ciudad sang Iloilo sa ginpatigayon nga drug buybust operation sa Purok Hollow Blocks, Barangay Singcang-Airport ciudad sang Bacolod alas 3:21 sang hapon, subong nga Dominggo, Mayo 18.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, nagpatigayon sila sang drug buybust operation sa isa ka establishmento kun sa diin nangin madinalag-on ang drug buybust operation kag natigayon nga marecover ang 1100 grams sang suspected shabu nga may standard drug price of Php 9,130,000.00.
Suno kay Cayao, ang suspek ang ginkilala kay alyas Chery kag residente sang Brgy. San Pedro, Jaro, iloilo City.
Suno sa station commander ang babayi ang nagadeliver sang illegal nga druga sa area sang Bacolod City kasubong man sa Negros Occidental.
Kapin isa ka bulan man ang ginpatigayon nga monitoring antes ang nangin madinalag-on nga drug buybust operation.
Santo sa monitoring sang Bacolod Police Station 8 sa tion nga may dalagko nga order nagalusot ini sa ciudad kag sa probinsya.
Mensahe sini sa mga pumuluyo nga nasakupan sang nasambit nga police station nga ang mga kapulisan ang nagadouble time sa pag-away sa illegal nga druga agud nga maminimize na ini kag wala na sang madamo nga maguba nga kabuhi bangud nakumpiskar ang dako nga volume sini sa ginpatigayon nga drug buybust operation.
