Patay ang driver sang motorsiklo matapos maaksidente malapit sa kilid sang Araneta Flyover sa Brgy Singcang Airport, Bacolod City ala-1:15 kaina sang kaagahon.
Ang biktima ang ginkilala nga si Leomar Alpetche, 27 anyos, residente sang Prk Tuburan, Brgy Cayhagan, Sipalay City.
Sa inisyal nga imbestigasyon sang Bacolod Police Station 8, ang motorsiklo ang nagabyahe gikan sa sur padulong sa norte nga dereksyon sang Araneta Highway.
Apang pagdangat sa Araneta Flyover, hinali nga nagwarik ang motorsiklo sa natuo nga dereksyon kag nakabunggo sa gutter gani naglabog ang driver kag nagbunggo sa concrete nga poste kag nalampos ang ulo sa sementado nga dalan.
Ang biktima ang gindala pa sa Corazon Locsin Montelibano Memorial Regional Hospital, apang ini ang gindeklarar nga dead on arrival bangod sa malala nga injuries.
Ang motorsiklo sang biktima ang yara sa karun sa paghinakop sang Bacolod Police Station 8 para sa nagakaigo nga disposisyon.
