Pilason ang apat ka persona matapos magbunggu-anay ang duha ka motorsiklo sa Araneta Highway sa atubang sang South Bacolod General Hospital, Brgy Pahanocoy, Bacolod City ala-1:05 kaina sang kaagahon.
Ang mga biktima ang ginalakipan sang driver nga si Jay Dimzon, 31 anyos kag angkas sini nga si Louell Vela, 42 anyos, lunsay residente sa Prk San Jose 1, Brgy Sum-Ag, Bacolod City nga sakay sa blue nga Yamaha Nmax; kasubong man ang driver nga si Acer Ardiente kag backrider sini nga si Jomarie Ladonse, 45 anyos, lunsay residente sang Prk Kalubihan, Brgy Tabunan, Bago City nga sakay naman sa itom nga Kawasaki Barako.
Sa imbestigasyon sang Traffic Enforcement Unit sang Bacolod City Police Office, si Dimzon ang nagabyahe gikan sa Norte padulong sa Sur, samtang sugata naman nila sanday Ardiente.
Matapos ang aksidente, gilayon man nga ginpasulod sa ospital ang apat para sa nagakaigo nga pagbulong.
Ang ila mga motorsiklo ang yara sa karun sa kustodiya sang Bacolod Police Station 8.
