Ginreklamo sang mga pumuluyo sa Purok Zone 1, Barangay Handumanan, Bacolod City, ang piggery nga yara sa residential area bangod sa baho.
Sa interview sang Bombo Radyo Bacolod kay Cristina Medina, nagadangat sa 30 ang mga baboy nga ginasagod sang ila kaingod apisar nga ini ang yara sa residential area.
Apang ini ang ginareklamo naman sang nakapalibot nga mga pumuluyo bangod sa tuman nga baho.
Suno kay Medina, bisan medyo malayo ang iya computer shop, nagalab-ot gihapon ang baho nga ginareklamo sang iya mga customer.
Dugang pa sini nga may mga tion nga nagasininggitanay na ang mga pumuluyo kag ang tag-iya sang baboyan bangod sa problema.
Isa sa concern ni Medina amo ang iya iloy nga 87 anyos, kag nagapuyo kaingod sang baboyan, bangod ini ang ginahapo na tuga sang baho.
Bisan siya ang nagasaka naman ang blood pressure kag madamo man ang mga kabataan nga nagmasakit bangod indi maka-agwanta.
Ini ang una nila nga ginpadangat sa Barangay, apang sila ang gintanyagan nga magreklamo sa purok chairman.
Kasunod sini, sila ang gintugyanan naman nga maghimo sang petisyon nga pirmahan sang tanan nga nagareklamo.
Apang nag-ayo naman ang tag-iya sang baboyan nga siya ang hatagan sang isa ka bulan samtang nagapangita pa sang masayluhan.
Hingyo lamang sang mga pumuluyo diri, nga limpyuhan agud indi mag-alisngaw ang baho gikan sa tangkal.
Apang padayun gihapon nga naga-alisngaw ang baho, gani liwat sila nagdangop sa Barangay, kun sa diin liwat naman nga nag-ayo ang tag-iya sang baboyan nga hatagan sang 20 ka adlaw agud makasaylo.
Bangod sini, nagdangop na si Medina sa Bombo Radyo Bacolod.
Apang nagalain man ang buot sini bangod ang mga nagpirma sa petisyon ang wala na nag atubang sang ginhingyo sini nga sila ang ulupod nga mag-atubang sa media.
