Ginpanindugan sang Presidente sa Bacolod Alliance for Commuters Operators and Drivers Inc. (BACOD) nga una nga nagpanapungol ang driver sang Kabakod Negros Transport Coalition Incorporated (KNETCO) gani ini ang ginpulihan sang ila miyembro.
Sa interview sang Bombo Radyo Bacolod kay Rudy Catedral, luyag lamang nila nga updan ukon ugyunan ang ila nga rally protesta bilang preparasyon sa Congressional hearing bwas.
Nag-ugyon man ang iban nga jeepney drivers sang ila gin-ayo nga magreroute, apang si Charlie Jalandoni ang makapila ka beses nga nagalabay-labay sa ila nga kaangay nga nagapang-insulto.
Gani ini ang ila ginparahan, apang sang ginasugilanon ini sang tigulang na nila nga miyembro, una nga nagpanapungol si Jalandoni.
Bangod sini siya ang ginpulihan sang BACOD members kag ginguba ang salakyan.
Panindugan ni Catedral nga palarehas lamang sila sang sitwasyon bangod 239 lamang ka mga unit ang napahanugutan sang Land Transportation Franchising and Regulatory Board (LTFRB) Region 6.
Ginakwestyon naman sini ang papel nga nabutang sa atubang sang KNETCO unit nga nakabutang nga sila ang ginhatagan otoridad ni Vice Mayor El Cid Familiaran nga makabyahe.
Apisar nga wala sang pahanugot sang LTFRB, reklamo ni Catedral kun ngaa padayun sa pagbyahe ang mga KNETCO members kag wala ginadakop sang Land Tansportation Office (LTO) – Bacolod.
Gintawag man sini nga talawan si LTO-Bacolod Head Renato Novero kag indi patas ang implementasyon.
