BACOLOD CITY – Nag-ani bulawan nga medalya ang isa ka atleta sang ciudad sang Bacolod kag nalapawan pa sini ang national junior record sang Pilipinas sa patag sang long jump sa nagapadayon nga Philippine National Open Invitational Athletics Championships.
Si Jose Jerry Belibestre, 18-anyos, kag pumuluyo sang Fortune Towne, Barangay Estefania, ciudad sang Bacolod ang gindeklarar nga kampeon sa patag sang long jump sa diin nakakuha ini sang 7.43 meters nga mas mataas ikumparar sa junior record sa Pilipinas nga 7.41 meters nga subong lang na-break humalin sadtong 1999.
Apang suno kay Coach Miguel Arca, sarang pa ni Belibestre nga maglumpat sang kutob sa 7.53 meters nga amo ang iya nga personal best.
Ang National Athletics Open padayon nga ginapatigayon sa ciudad sang Ilaga, probinsiya sang Isabela.
Samtang, target sang 18-anyos nga si Jose Jerry Belibestre nga maghampang sa Southeast Asian Games ukon SEA Games matapos nga ini ang nangin gold medalist sa National Athletics Open.
Bugalon man ini bangud tuman kalayo sang iya abanse sa nangin silver medalist sa ila nga hampang kaina sang aga.
Suno kay Jose Jerry, daku ang pasalamat sini sa iya nga pamilya bangud sa ila wala-untat nga suporta.
Si Belibestre ang graduate sang Romanito Maravilla National High School kag karon nagaeskwela na sa University of Negros Occidental Recoletos (UNO-R).
