100 percent na nga naenergized sang Negros Electric and Power Corporation (NEPC) ang bilog nga ciudad sang Baolod samtang yara na sa 98 percent ang naenergized sa tanan nila nga franchise area.
Sa interview sang Bombo Radyo Bacolod kay Engr Leomel Tambanillo, assistant vice president for planning and business operation sang Negros Power, ang nabilin na lamang nga wala sang kuryente amo ang mga lugar nga tuman ka layo kag mabudlay sudlon matapos nga maguba ang dalan kag taytay kasunod sa paglaslas sang bagyo Tino.
Suno diri, sa cudad sang Bago may yara sang kapin 4,000 pa ka consumers ang wala sang kuryente, sa banwa sang Murcia may kapin 600 pa, kag sa banwa sang Salvador Benedicto may yara na lamang sang kapin 140 ka consumers nga ginatinguhaan nga mahatagan sang kuryente.
Suno kay Tambanillo, ginabanta nga isa ukon duha ka adlaw na lang ang trabaho kag fully energized na ang tanan nga banwa kag ciudad nga sakop sang ila franchise area.
Samtang, ginpa-athag naman sini nga ang nagaka-eksperyensyahan nga power interruption sa karun ang ginalauman na nga matabo sa tion nga may mabaskog nga hangin apisar nga intact ang linya kun kaisa may yara sang loose connection nga indi gilayon matukiban.
