Nagpasar na sang resolusyon ang Sangguniang Panlungsod sa ciudad sang Bacolod para sa pagtukod sang ad hoc committee nga magareview sa provision sang Comprehensive Revised Reclamation Agreement (CRRA) sa tunga sang ciudad, Bacolod Real Estate Development Corp (BREDCO) kag Philippine Reclamation Authority.
Sa interview sang Bombo Radyo Bacolod kay Councilor Al Victor Espino, chairman sa Committee on Laws, Ordinances and Good Governance Committee, nga ang BREDCO ang nagrequest sang Resolution Of No Objection (RONO) sa City Council para sa tinutuyo nga rehabilitation kag reenginering sang ila nga Roll on Roll off (RoRo) port.
Apang nakita sang mga ini nga madamo sang violation ang BREDCO, kun sa diin ang finger port nga ginapanag-iyahan sang ciudad ang ginaclaim sang mga ini nga indi kabahin sa CRRA kag propedad sang BREDCO.
Suno kay Espino, nakita sang Committee on Laws nga ang papel nga ginahuptan sang BREDCO ang miscellaneous sales kag lease application lamang sa Department of Environment and Natural Resources (DENR).
Nagapati ini nga ang may kinamatarong sa pagreclaim sang duta amo ang property owner kag indi ang may accretion claim lamang.
Paathag ni Espino nga kun makita nga disbentaha sa Bacolod City Government, dapat nga irectify kun diin ang may sala.
Suno diri, tanan nga konseho ang sarang nga maka-upod sa ad hoc committee, kag sila ang magapatigayon sang committee conference agud matumod kun sin-o ang luyag makabahin sa imbestigasyon.
Panindugan ni Espino nga luyag nila nga mahatag sa Bacolod City ang nagakadapat sini nga mabatun.
