Ang atop ukon roofing lamang sang fish section sa Libertad Public Market ang asikasuhon sang Bacolod City Engineer’s Office kag indi magapatigayon sang total renovation sang merkado.
Ini matapos matukiban nga madamo sang mga buho-buho ang atop sang fish section kag ginakahangaw-an nga magatulo sa tion sang tig-ululan.
Sa interview sang Bombo Radyo Bacolod Engr. Loben Ceballos, officer in charge sa Bacolod City Engineer’s Office, magluwas sa roofing, ila man nga kay-uhon ang gutter kag down spout sang meat section.
Paathag sini nga ipabilin lamang ang desinyo sang merkado kag magapatigayon lamang sang repairs, kalakip na ang pag-ilis sang mga gabok na nga kahoy nga roof trusses.
Suno kay Ceballos, duha ang component nga kinahanglan sa repairs sang merkado nga ginalakipan sang labor kag materials.
Sila ang may-ara na sang kontrata sa magatrabaho sa balor P2 million nga proyekto.
Sa karun ang ginahulat na lamang amo ang purchase order sang mga materyales.
Nagalaom si Ceballos nga masuguran ang programa subong nga bulan sang Mayo.
