Ginpatigayon subong nga adlaw ang kick-off sang fire prevention month sa ciudad sang Bacolod nga gin-umpisahan sa motorcade kag may yara man sang programa nga ginpatigayon sa Bacolod Fire Station Central Station sa dalan San Juan sa ciudad.
Sa interview sang Bombo Radyo Bacolod kay Fire Chief Inspector Stephen Jardeleza, Fire Marshal, Bacolod City Fire Station, madamo ang nag-upod sa ginpatigayon nga motorcade para sa kick-off sang fire prevention month agud nga magpakita sang suporta sa kampanya batok sa makahalalit nga kalayo.
Suno kay Jardeleza, duha ka routa ang ginpatigayon nga motorcade kun sa diin ang isa ang padulong sa south samtang ang isa ang padulong sa norte nga bahin sang ciudad kag nagtabu-ay sa central station sa dalan San Juan para sa malip-ot nga programa.
Suno diri, madamo sila sang ginhanda nga mga aktibidad para sa fire prevention month nga ginalakipan sang bloodletting sa March 3, 2nd Mayor Albee fire olympics, road show, CFAG training kag madamo nga iban pa.
Suno sa Fire Marshal nga halos kada semana sa bulan sang Marso may yara sila sang patigayunon nga mga aktibidad para sa Fire prevention Month.
Ginpahayag ni Jardeleza, sa karun nga 2024 madamo na sang human activities isa ka bagay nga ginalantaw nga nagdamo ang mga fire incidents.
Santo sa record, humalin sang Enero tubtob sa Pebrero subong nga tuig, nagdangat sa 72 ang fire incidents.
Nagpahanumdom man ini nga siguruhon nga nakakas ang mga nakasaksak sa kuryente, napatay ang kandila, indi pagpabay-an ang mga ginaluto kag indi maghaboy sang upos sang sigarilyo bisan diin lang bangud unsafe habits will create fire.
