Nagtakop na ang ginpatigayon nga Negros Island Region Athletics Association (NIRAA) Meet 2026.
Sa closing ceremony ang Bacolod City ang ginkilala nga overall champion nga may 165 gold, 102 silver, kag 102 Bronze; first runner-up amo ang Negros Occidental nga may 150 gold, 152 silver, kag 102 bronze samtang ang 2nd runner up amo ang Negros Oriental nga may 33 gold, 39 silver kag 59 bronze medals.
Ginpasalamatan ni Department of Education-Negros Island Region Director Dr. Ramir Uytico ang DepEd Division of Bacolod City, Bacolod City Government kag ang mga tawo nga nagbuligay kag nagsuporta agud nga mangin madinalag-on ang pagpatigayon sang regional meet.
Suno kay Uytico, bisan may yara sang sakripisyo sa bahin sang Bacolod City kasunod sa pag-host sini sa regional meet ginpakita sang isa ka Bacolodnon kung paano ang mga ini mag-host sang mga bisita.
Suno diri, ginapanginbulahan niya ang tanan sa ciudad sang Bacolod bangud sa pagbalik sang kada isa sa 12 ka delegasyon ang kalipay nga ila naeksperyensyahan gikan sa ciudad kun sa diin ginpatigayon ang regional meet.
Samtang may yara naman sila sang napilian nga mga atleta nga magarepresentar sang Negros Island Region para sa Palarong Pambansa matapos nga nakapasa na ang mga tournament directors sang mga pangalan.
Ginpahayag man ni Uytico nga may yara sang tatlo ka mga Division Offices ang nagpahayag nga luyag sang mga ini nga mag-host sang madason nga Negros Island Region Athletics Association (NIRAA) Meet.// Suno kay Uytico ini ang ginalakipan sang Siquijor, Dumaguete City kag Silay City.
Suno diri, ipaidalom nila ang tatlo sa evaluation agud makita kung sin-o ang handa kag kapasidad sa paghost sang regional meet.
