Nagpaguwa sang health advisory ang Bacolod City Health Office nahanungod sa haze halin sa forest fires sa Indonesia.
Sa interview sang Bombo Radyo Bacolod kay city health officer Dr. Carmella Gensoli, ginpahayag sini nga magluwas sa social media nagpanagtag man sila sang health advisory sa mga barangay, eskwelahan kag sa mga pampubliko nga lugar tuhoy sa mga dapat himuon agud malikawan nga maapektuhan sang aso gikan sa nagakasunog nga kagulangan sa Indonesia.
Nabutang man sa health advisory nga gilayon magpa-check up kun makabatyag sang kabudlay sa pag-ginhawa.
Madumduman nga ginkumpirmar na sang Environmental Management Bureau (EMB) Region 6 nga naglab-ot na sa Bacolod City kag Negros Occidental ang haze nga halin sa nagapadayon nga masangkad nga forest fires sa Indonesia.
Ang haze ang ginalakipan sang aso ukon smog nga ginaupdan sang tuman ka pino nga yab-ok kag light vapor nga nagatinir sa kahawaan gani delikado ini sa ikaayong-lawas.
