Nangayo si Bacolod City Mayor Greg Gastaya sang proposal halin sa Department of Social Services and Development kun paano mabuligan kag mahatagan sang pagtamod ang street children sa ciudad.
Madumduman nga ginbisitahan sang alkalde ang mga menor de edad nga nagapangayo-kayo kag nagapamahog gamit ang bitbit nga kutsilyo nga nadakpan sang kapulisan sang Bacolod Police Station 1.
Naglapta sa social media ang video kun sa diin ang mga bata nga naga-edad 12, 13 kag 15 anyos nga nagapangayo-kayo sa isa ka fastfood chain sa palibot sang Bacolod City Public Plaza nga may bitbit nga patalom.
Suno kay Gasataya, mabudlay nga involved sa amo nga sitwasyon ang mga menor de edad.
Suno diri, dapat padayon ang pagdiskusyon sang DSSD sa mga ginikanan kun paano ang husto nga pag-atipan sa mga kabataan samtang gintugyan naman sini sa Bacolod City Police Office ang pagbantay sa safety sang publiko.
Samtang, nagpaandam naman ang DSSD sa mga ginikanan nga sarang nila kuhaon ang mga kabataan kun ginapabay-an.
Suno kay DSSD Head Richelle Verdeprado-Mangga, ginatsekyar nila ang estado sang ginikanan kun may kasarang ini nga mag-atipan sa bata.
Suno diri, kun ginpabay-an sang ginikanan ang mga bata mahimo nga kuhaon sang DSSD ang bata halin sa kusotdiya sang ginikanan ukon guardian.
Apang may yara man sila sang assistance nga ginahatag sa mga ginikanan kag guardian kun ano ang insakto nga pag-atipan sa bata.
