Pormal na nga gintukod ang Task Force African Swine Fever sang ciudad sang Bacolod.
Lunes nga adlaw, gin-issue ni Mayor Evelio ‘Bing’ Leonardia ang Executive Order No. 27 Series of 2019 nga amo ang nagatukod sang task force.
Suno diri, kinahanglan ang preventive measures agud nga mapunggan ang dako nga kapierdihan sa ekonomiya kag maproteksyunan ang swine industry sang ciudad.
Suno sa alkalde, kinahanglan ang hugot nga monitoring kag inspection agud nga mapunggan ang outbreak sang ASF.
Mismo si Leonardia ang nagatindog nga chairperson sang task force samtang si City Agriculturist Atty. Goldwyn Nifras naman ang vice-chairperson.
Miyembro man sini ang iban nga opisyales sag City Council kag iban nga ahensya sang gobyerno kaangay sang Bacolod City Police Office, City Legal Office, City Veterinary Office, Bacolod City Health Office, Local Disaster Risk Reduction and Management Office, tiglawas sang business sector kag Task Force Butagoy.
Kabahin sa mga obligasyon sang task force amo ang pagdihon sang contingency plan para sa prevention and control sang ASF, pagpatigayon sang massive information and awareness campaign sa tanan nga stakeholders tuhoy sa ASF outbreak, pagpatigayon sang imbestigasyon kag control protocols sa mga lugar nga ginapatihan may ASF kag pagpatuman sang quarantine measures.
