Naghatag sang paathag ang City Prosecutor sa Bacolod City sa rasun kun ngaa P60,000 lamang ang ginrekomendar nga bail bond sa Indian National nga nag-arado sang mga nagaprusisyon sa Brgy Alangilan kag nakapatay sa tatlo.
Madumduman nga dead on the spot si Jonelo Solan Sr. driver sang tricycle nga upod sa prusisyon matapos ginbungguan sang Toyota Innova.
Dead on arrival naman ang pasahero nga si Gilven Tabique kag si Daynah Plohinog ang napatay kasunod nga adlaw sa ospital.
Samtang madamo naman sang nasamaran.
Ang driver sang salakyan amo si Jagpret Singh, 37 anyos, nga ginpasakaan sang kaso nga reckless imprudence resulting to multiple homicide, multiple physical injuries, kag damage to property apang ini ang nakapyansa sang P60,000.
Sa press conference ni Bacolod City Prosecutor Atty. Ma. Theresa Ditching, ginpaathag sini nga may yara sila sang ginasunod nga guide para sa recommended bail.
Suno kay Ditching, ang reckless imprudence resulting to multiple homicide nga ginpasaka batok kay Singh ang nalakip sa correctional ukon afflictive category.
Sa idalom sang Article 365, Paragraph 6, No. 2 sang Revised Penal Code, 10 ka tuig nga pagkapriso ang maximum nga sentensya para diri. Ang 10 years ang gin-multiply sa P6,000 gani nagresulta ini sa P60,000 nga recommended bail.
Ini ang paathag sang City Prosecutor matapos nga sila ang gin-ulan sang kritisismo bangod P60,000 lamang ang bail apisar sang tatlo ka kabuhi nga nadula.
