Nagapaidalum sa karun sa home isolation si Bacolod City Vice Mayor El Cid Familiaran matapos nagpositibo sa COVID-19.
Sa interview sang Bombo Radyo kay Familiaran, sang tinalikdan nga semana, siya ang nagsuprer sang hilanat kag pagpalanakit sang lawas gani nagpaidalum ini sa swab test kag nagpositibo ang resulta sang Sabado.
Kahapon, siya ang nagpareswab bangud wala na ini sang hilanat kag magapreside kuntani sa session, apang positibo sa gihapon ang resulta sini.
Suno sa bise-alkalde, ini ang labing una nga kahigayunan nga siya ang nagpositibo sa virus kag sa sulod sang malapit tatlo ka tuig nga nagpungko ini bilang head sang Task Force against COVID-19 kag madamo sang exposure, wala ini nadutlan.
Suno diri, sadto tuman gid ang iya paghalong kag siya ang nagsunod gid sa mga protocols.
Ginalantaw sini nga iya nakuha ang virus sang ini ang nagtambong sa Vice Mayors’ League sa Metro Manila sang tinaikdan nga semana kun sa diin sila ang nagpapicture kag nagkaon sa sulod sang hall.
Sa karun wala na ini nagasuprer sang sintomas sang COVID kag ginpahayag nga siya ang fully vaccinated na kag nakapatublok naman sang booster shot.
Nagpanugyan si Familiaran sa publiko nga indi magsalig kag maghalong sa gihapon.
