Ginpanawagan sang Election Officer sa ciudad sang Bacolod sa mga wala pa makaparehistro sa Commission on Election (COMELEC) bangod nagahilapit nalang ang registration deadline sa Setyembre 30.
Madumduman nga ang registration period ang gin-umpisahan sang bulan sang Pebrero.
Sa interview sang Bombo Radyo Bacolod kay Bacolod City Election Officer Atty Kathrina Trinio Caña, ginalantaw sini nga dyutay lamang ang nakahibalo nga padayun ang registration bisan Sabado sa ila nga opisina.
Gani panugyan sini sa mga estudyante kag mga nagatrabaho, nga maayo nga magparehistro kun Sabado bangod dyutay lamang ang ila ginacater.
Samtang wala naman sang patigayunon nga satellite registrations sa mga Barangay bangod halos nalibot naman nila ang dalagkuan nga mga Barangay sa Bacolod City.
Paathag sini nga gin-untat nila sang temprano ang satellite registration sa mga Barangay bangod sa masami kun malapit na lamang ang deadline, madamo na ang nagaparehistro sa Comelec office.
Ang mall registration sang Comelec ang ginapatigayon Lunes tubtob Huwebes samtang Biyernes kag Sabado, sila ang sa Comelec Office na lamang nagabatun sang applications.
