Patigayunon ang pinakauna nga Bacolod Film Festival sa maabot nga Hulyo 2024.
Santo ini sa ordinansa nga gin-author ni Councilor Em Ang nga sang damlag lang gin-aprubahan sang Sangguniang Panlungsod sa third kag final reading.
Sa pressconference, ginpahayag ni Councilor Em Ang, chairperson sang Committee on History, Culture, and Arts sa Sangguniang Panlungsod, ginapreparar na sa karun ni Bacolod City Mayor Alfredo “Albee” Benitez ang executive order nga nagaconvene sang Bacolod Film Festival council nga magapanguna sang nasambit nga aktibidad.
Suno kay Ang, luyag sang alkalde, nga kada bulan may yara sang kahiwatan sa Bacolod sa tinutuyo nga makaganyat sang mga bisita.
Sa idalom sang ordinansa, P1 million ginpain nga pondo sang Bacolod City Government pero ginaduso sang alkalde nga himuon ini P3 million subong nga 2024.
Una na nga ginpahayag ni Ang, nga magapatigayon sila sang pre-screening kag ginalantaw nga napulo ukon manubo ang mga local films nga magapasakop sa Film Festival.
Magahatag ang Local Government Unit sang P300,000 nga subsidy sa qualified nga mga entry.
Nagpangabay na si Ang sa mga sinehan sa mall sa Bacolod nga magtalana sang duha ka semana para ipagwa ang mga short films lamang.
Nakacoordinate naman ang ciudad sa DTI sa nasambit nga aktibidad.
May yara man sang awards night nga patigayunon sa sini nga film festival nga pareho sang Metro Manila Film Festival.
Nagapati si Ang kag Benitez nga madamo sang talento ang Bacolodnon sa paghimo sang mga pelikula.
