Nagapanawagan ang station commander sang Bacolod Police Station 9 sa mga indibidwal nga may salakyan nga posible nahagip sang dashcam ang natabo nga shooting incident kun sa diin napatay ang negosyante sa Purok Masagana, Barangay Sum-ag, Bacolod City sang Hulyo 16 sang hapon, nga makig-angot sa kapulisan agud mabuligan ang imbestigasyon.
Ang biktima ang ginkilala nga si Greg Alvin Gelito, 39 anyos, tumandok sang Barangay Felisa apang nagapuyo na sa karun sa Barangay 35, Bacolod City.
Ini ang ginluthang sang pasulod na kuntani sa iya salakyan gikan sa pagkaon sa talabahan sa nasambitan nga lugar.
Sa interview sang Bombo Radyo Bacolod kay Police Captain Michael Tuburan, officer in charge sang Bacolod Police Station 9 sa karun may mga litrato sila nga ginapakita sa driver ni Gelito kag iban pa nga mga nakawitness sa krimen.
Ini bangod nahibaluan nga antes paman ang pagpangluthang, nakita na ang duha ka mga suspect nga nagatambay sa nasambitan nga kalan-an.
Ginpahayag man sini nga wala pa nila maestorya ang pamilya sang biktima para sa dugang nga impormasyon.
Sa karun magluwas sa motibo may kaangtanan sa utang, ginalantaw man nga posibilidad sang pagpatay ang relasyon sini sa katrabaho ukon kahisa bilang isa ka contractor.
Ang mga ginalantaw nga suspect ang nagsakay sa Baja nga motorsiklo kag nagasuksok sang stripe nga bayo.
Nahibaluan nga si Gelito ang ginblotter sa Boracay bangod sa kaso nga esfata kag pagbayolar sa bouncing cheque law samtang ini ang ginapadal-an man sang demand letter sa ila nga balay bangod sa balayran nga masobra P800,000 sa isa ka Hardware Trading sa ciudad sang Bacolod.
