Nagahulat pa sang derektiba ang Bacolod Traffic Authority Office (BTAO) gikan sa Land Transportation Franchising and Regulatory Board (LTFRB), Land Transportation Office (LTO) kag kay Bacolod City Mayor Alfredo “Albee” Benitez, natuhoy sa pagpangdakop sang mga colorum nga traditional jeepneys.
Sa interview sang Bombo Radyo Bacolod kay BTAO Head Patrick Leonard Lacson, sa personal sini nga panulok kulang pa sang preparasyon ang LTFRB kag wala nakonsiderar ang Local Public Transport Route Plan (LPTRP).
Suno diri, kuntani ginlantaw anay kun nagakaigo na ang numero sang mga makabyahe nga public transport sa kadamuon sang mga pumuluyo nga nagabyahe.
Apang ini ang sa masami indi masabat sang ahensya.
Nakita sini mismo sa mga post sa social media, nga madamo sang mga pumuluyo nga nastranded sa dalan kagab-i, kun sa diin nag-expire na ang extension sa consolidation process.
Bangod sini ang mga unconsolidated jeepneys nga magabyahe sumugod subong nga adlaw ang makonsiderar na nga colorum.
Aminado ini nga ang sitwasyon ang makabig na nga national issue, apang papel man sang local government unit nga solusyonan ang problema sang publiko.
Sa karun ginatugyan na ni Lacson sa LTO kag LTFRB ang nahanungod sa dakpanay, kag sila ang magafocus lamang sa pagpangdakop sa mga nakaandan nga traffic violations.
Dugang pa sini nga mas maayo nga panilagan anay ang lihok sang iban nga LGU kaangay sa Iloilo kag Cebu antes magpatuman sang pagpanakop, bangod aminado ini nga inkaso magsala ini ang makatuga sang dako nga impact.
Suno diri, sila ang may Task Force Anti-Colorum apang ini ang para lamang sa mga e-bikes kag tricycle bilang konsiderasyon sa mga tricycle drivers nga nakarehistro sa ciudad kag barangay.
Apang sa tion nga magdagdag sang executive order si Mayor Albee Benitez, sila nga mga government employees ang wala man sang mahimo kundi magsunod, ilabi na nga ang PUV Modernization Program ang mandato gikan sa National Government.
