Nagpasa na sang eksplinasyon si Bacolod Traffic Authority Office (BTAO) Head Patrick Leonard Lacson matapos gindagdagan sang notice to explain ni Bacolod City Mayor Alfredo “Albee” Benitez.
Ini kasunod sa ginpagwa nga memorandum order, nga nagaderekta sa mga traffic personnel sang apprehension nga lima ka traffic violators kada adlaw, kag ang indi makalab-ot sa qouta ang subject for termination.
Sa interview sang Bombo Radyo Bacolod kay Lacson, matapos magpahayag ang alkalde nga irecall ang memo, iya man ini gilayon nga ginbawi.
Paathag sini nga ang memo ang iya nga ginpagwa matapos makabatun sang madamo nga reklamo natuhoy sa mga traffic enforcers nga wala nagapanakop apisar nga yara na sa ila atubangan ang mga violators.
Apang nagasalig man ini sa wisdom sang alkalde gani siya ang nagsunod kag nagpasa man sang eksplinasyon subong nga adlaw.
Ginabatun naman ni Lacson ang accountability sa desisyon kag nagpasalig nga iya batunon ano man ang konsekwensya.
Apang panindugan sini nga sa mga Open World Countries pati na sa Metro Manila Development Authority (MMDA) may ara man sang ginapatuman nga qouta para sa traffic apprehensions, kag ini ang nakita man nga epektibo.
Nagapati si Lacson nga ini ang nakadepende lamang sa management style, apang nagapati man ini nga may basihan si Mayor Albee Benitez sa pahayag nga unfair ang pagpatuman para sa mga motorista kag enforcers.
Sa karun, sila ang magapause anay, kag hulaton na lamang sang mga ini ang desisyon sang alkalde.
Aminado naman ini nga ang isa sa iya kakulangan amo ang indi pagkonsulta sa ipatuman nga derektiba kay Bacolod City Legal Officer Atty Romeo Carlos Ting Jr., Committee on Transportation Chairman Councilor Al Victor Espino kasubong man sa alkalde.
Apang paathag sini nga sa marching order ni Benitez, ginpahayag sini nga iya ginatugyan sa pamunuan sang BTAO ang pagpatuman sang mga derektiba kun makita nga makamaayo sa mga pumuluyo.
Ini bangod malawig pa ang proseso kun magalabay sa pagtalakay sang Sangguniang Panlungsod
