Duha ka mga individual sports ang ginbuy-an sang Bacolenia athlete nga si Bernalyn Bejoy bangod sa iya ginasuprer nga injury kag ginprioritize ang paghampang sa Women’s 4x100m Relay sa 31st Southeast Asian Games 2021 kun sa diin sila ang nakaangkon sang bronze medal.
Ang 21 anyos nga atleta ang tumandok sa Fortune Town, Barangay Estefania, Bacolod City.
Sa exclusive interview sang Bombo Radyo Bacolod, ginpakigbahin sini nga ang target nila amo kuntani ang makuha ang silver medal apang sila ang nagpangtatlo batok sa Vietnam nga nakakuha sang gold medal kag ang Thailand naman ang nakadaog sang silver medal.
Ang mga atleta nga kabahin sa relay ang ginalakipan nanday Robyn Brown, Bernalyn Bejoy, Jessel Lumapas kag Maureen Schrijvers.
Nangin dako naman ang distansya sang nagdaog sang bulawan apang halos dikit lang ang Pilipinas kag ang Thailand.
Suno kay Bejoy, antes paman ang hampang may injury na ini sa hamstring sa nawala nga bahin sang tiil ukon makaduha ka beses nga nagpitik ang iya pusog-pusogan kag nagdangat sa anom ka adlaw ang recovery.
Sa tion sang kompetisyon, nakahampang pa ini sa 4x400m Mixed Relay kun sa diin nasungkit man sang mga ini ang bronze medal kag kaupod sini sanday Joyme Sequita, Jessel Lumapas kag Edgardo Alejan Jr..
Pahayag ni Bejoy nga wala pa ini nakabatyag sang pagsakit sang tiil sa una nga pagdalagan sa mixed relay bangod sa adrenaline apang nabatyagan na sini ang pagsakit sang tiil matapos ang hampang.
Bangod sa ginabatyag, ginhingyo sini sa ila nga mga coach nga indi nalang ini maghampang sa iya duha ka individual sports nga ginalakipan sang 400 meter Hurdles kag 800 meter Run bangod kun hampangan niya ang mga ini, wala na siya sang ikasarang nga maghampang sa Women’s Relay kun sa diin nakita sini nga mas may tyansa nga sila ang makaangkon sang medalya.
Suno kay Bejoy sa Women’s Relay, nagakabatyagan na sini ang sakit sa iya pusog-pusogan samtang nagadalagan kag ang ginapinsar nalang sini nga bisan ano matabo iya malab-ot ang finish line.
Paathag sini nga wala sa schedule sang hampang sini ang Women’s Relay sang yara palang sa Pilipinas kag didto na sa Vietnam nadesisyonan nga siya ang I-line up.
Si Bejoy amo ang pinakabata sa ila nga team.
Ini ang ikaduha na nga beses nga siya ang naghampang sa SEA games bangod kabahin man ini sa 2019 Southeast Asian Games nga ginpatigayon sa Pilipinas.
