BACOLOD CITY — Ginpasalig sang bag-o nga regional director sang Police Regional Office 18 nga magapadayon ang pag-away sang mga kapulisan sa Negros Island Region sa iligal nga druga, illegal gambling kag korapsyon.
Ini ang ginpasiguro ni Police Chief Supt. Edmund Gonzales kadungan sang turnover of commany ceremony nga ginpatigayon kahapon sang hapon, bulos kay Police Chief Supt. Renato Gumban nga magaretiro na bwas nga adlaw, Mayo 21.
Suno kay Gonzales, marching order ni PNP Chief Police Director General Ronald ‘Bato’ Dela Rosa ang pag-away sa illegal drugs, illegal gambling kag ang pagpatigayon sang anti-criminality campaign.
Suno diri, ginatinguhaan sa karun nga mabalik ang kredibilidad sang mga pulis bilang kabahin sang ila internal cleansing.
Si Gonzales ang anay pinuno sang Philippine Maritime Group kag tumandok sang Lambunao, Iloilo.
Bangud wala si Dela Rosa, ang turnover of command ceremony kahapon ang ginpangunahan ni Police Deputy Director General Ramon Apolinario, ang deputy chief for administration sang PNP.
Antes ang pormal nga pagbiya ni Gumban, lubos naman ang pasalamat sini sa iya pamilya kag sa mga taga-Negros Island Region nga nagsuporta sa iya pagpungko bilang PRO 18 director.
