Napasakaan na sang kaso kriminal ang bag-uhanon nga pulis nga naaresto matapos naaktuhan nga nagahithit sang marijuana sa iya boarding house sa ciudad sang Bacolod sang Sabado.
Si Patrolman Bryan Jephtha Gimotea, 32-anyos sang Himamaylan City ang naaktuhan nga nagahithit sang marijuana sang iya training suspervisor.
Suno kay Bacolod City Police Office spokesperson Lt. Col. Ariel Pico, napaidalom na sa inquest proceedings si Gimotea kag natalana pa nga pasakaan ini sang administrative kag civil cases.
Nangin positibo ang drug test ni Gimotea.
Ang suspetsado ang nagapaidalom sa field training program sa Philippine National Police Regional Training School sa Brgy. Mansilingan.
Siya ang gin-aresto ni Police Senior Master Sgt. Emmanuel Alonsogay sang Police Station 1, alas-3:45 sang hapon sang Sabado kun sa diin nakuha sa posesyon sini ang improvised cigarette rolling paper nga may marijuana kag plastic pouch sang dried marijuana leaves.
