-- ADVERTISEMENT --

Wala man personal nga nakasaksi, handom sang isa ka iloy sa Bago City, Negros Occidental nga makuha sang grupo sang iya anak ang medalya sa hampang nga petanque sa nagapadayon nga Southeast Asian Games.

Si Navy Master Sergeant Nelson Dela Noche sa Villa Cristita, Brgy. Sampinit, Bago City, Negros Occidental ang kabahin sang Philippine squad sa petanque men’s category.

Kaupod sini sanday Julius Philip Bon, Mark Anthony Bon, Joshua Fuentes, Ambrocio GotiƱas kag Angelo Joseph Sangalang nga nagahampang sa Friendship Gate sa Clark, Pampanga.

Sa hampang nga petanque, ang team nga makaplastar sang ila bola nga steel sang mas malapit sa target ball kun ikomparar sa kontra amo ang makakuha sang mas mataas nga score.

Sa interview sang Bombo Radyo sa iloy ni Nelson nga si Emilita Dela Noche, nagtry-out ang player kaupod ang iya manghod nga miyembro man sang Philippine Navy apang siya lang ang nagpadayon bangud gina-asikaso sang manghod ang iya promotion.

-- ADVERTISEMENT --

Si Nelson ang miyembro sang National Dragonboat Team kag suno sa iloy, ginpasalig man sang iya bata nga himuon niya ang tanan agud magdaog ang squad.

Ginlaragway man ni Dela Noche ang iya anak nga mabuot kag matutom kag panugyan sini, mangamuyo kag indi magkalipat sa Ginoo sa ila nga paghampang.

Nahibalu-an nga uyat sa karun sang Thailand ang titulo sa petanque.