Mas nagkusog nagid ang Bagyo NANDO samtang ini ang yara sa Philippine Sea kag nagahulag padulong sa naaminhan-nakatungdan nga dereksyon.
Ang Bagyo NANDO, nga may International Name nga RAGASA, ang nagsanyog na sa Severe Tropical Storm category kagab-i.
Ang sentro sang Severe Tropical Storm NANDO ang ulihi nga nasiplatan sa 780 km sa nasidlangan sang Casiguran, Aurora.
Dala sini ang kabaskugon sang hangin nga nagadangat sa 100 km/h kag pagmadlos nga tubtob 125 km/h, samtang ini ang mahinay naman nga nagahulag sa kadasigon nga 10 km/h.
Ang Bagyo NANDO ang ginalauman nga magabaskog pagid samtang yara sa Philippine Sea kag magadangat sa Typhoon category sa masunod nga 12 oras.
Mataas man ang posibilidad nga ini ang magasanyog pa sa Super Typhoon category sa Lunes antes magpahilapit sa Batanes kag Babuyan Islands.
Ginalantaw nga magahulag ang Bagyo generally padulong sa naaminhan nga dereksyon sa masunod nga 24 oras antes magliko sa west northwestward nga dereksyon padulong sa Extreme Northern Luzon.
Sa forecast track, ang sentro sang Bagyo NANDO ang ginalantaw nga magalabay malapit ukon magalandfall mismo sa Batanes ukon Babuyan Islands sa Lunes sang hapon ukon sa gab-i.
Ini ang mahimo nga makagwa na sa Philippine Area of Responsibility sa Martes sang aga ukon sa hapon.
Pasanyugon man sang Bagyo NANDO ang Southwest Monsoon ukon Hangin Habagat sa paghilapit sini sa kadutaan.
Ginalantaw nga may mga lugar naman nga mahimo ipaidalom sa Wind Signal No. 1 sa bahin sang Northern Luzon subong nga adlaw.
Samtang ang pinakamataas nga mahimo idagdag sa paglabay sang Bagyo ang mahimo magdangat pa sa Wind Signal No. 5.
Subong nga adlaw, lauman nga ang Habagat kag Trough ukon extension sang Severe Tropical Storm NANDO ang magatuga sang mabaskog nga mga pag-ulan kag mabaskog man nga huyop sang hangin partikular na sa mga nabukid kag malapit sa kadagat sa bahin sang Bicol Region, Eastern Visayas kag Caraga.
