Nagdangat sa masobra tunga sa milyon ka pesos ang balor sang suspected shabu nga narecover sa duha ka ginakabig high value individual sa drug buybust operation nga ginpatigayon sa old runway sa Purok Kapalaran, Barangay Singcang-Airport, Bacolod City.
Ang mga suspect ang ginkilala nga sanday Murphy Villaflor, 55 anyos kag Gerald Marcelo, 44 anyos, lunsay wala sang trabaho kag residente sa Purok 1 Magsungay, Barangay Singcang-Airport.
Narecover sa mga ini ang lima ka dalagko kag apat ka elongated transparent plastic sachet sang suspected shabu nga ginabanta nagabug-at sang 80 gramos kag may standard drug price nga P544,000.
Magluwas sa suspected shabu si Marcelo ang nakuhaan pa sang isa ka cal. 38 revolver kag apat ka live ammunition.
Ang duha ka suspetsado ang natalana nga mangatubang sang kaso sa paglapas sang section 5 kag 11 sang Republic Act 9165 ukon Comprehensive Dangerous Drugs Act of 2002 samtang si Marcelo ang natalana magpangatubang sang dugang nga kaso sa paglapas sang Republic Act 10591 ukon Comprehensive Firearms and Ammunition Regulation Act
