Kaso nga parricide ang atubangon sang bana nga nagmartilyo sa iya nga misis tubtub nga ini ang mapatay sa Kabankalan City, Negros Occidental kahapon sang kaagahon.
Ang biktima ginkilala kay Delbeth Laurente, 40-anyos, samtang ang suspetsado ang ginkilala kay Saler Laurente, 44-anyos, lunsay mga residente sang Sitio Lucay Dos, Barangay Camingawan, Kabankalan City.
Suno kay Police Lt. Jomel Salarda, deputy chief sang Kabankalan City Police Station, nakabugtaw na lamang ang mga kabataan nga puno na sang dugo ang ila iloy kag nagahibi sa gwa sang ila balay ang amay.
Gindala ni Saler ang mga kabataan sa iya utod kag didto ini nagpanugid nga napatay niya ang iya misis paagi sa pagmartilyo sini sa ulo.
Sa bulig sang mga barangay tanod, naturnover sa Kabankalan City Police Station ang suspetsado.
Antes ang insidente suno kay Salarda, nagapangimon si Saler bangud nagapati ini nga may yara sang iban nga lalaki ang iya misis.
Sang tinalikdan nga adlaw, ginpasuni sang bana nga may nagahulat nga lalaki sa unhan sang ila balay nga ginpanginwala man sang biktima.
Antes pa gid sini, masami man ginasakit ni Saler ang misis.
Suno sa ila nga mga kabataan, pila na ka adlaw nga wala nagakaon ang ila amay kag masami nagainom sang alkohol.
