Isa ka bangkay sang tawo ang nasapwan sa pil-as sa Purok Cobra, Barangay Igmaya-an, sa banwa sang Salvador Benedicto alas-10:15 kaina sang aga.
Sa interview sang Bombo Radyo Bacolod kay Police Lt. Ignacio Javier, deputy chief of police sa Salvador Benedicto Municipal Police Station, ang bangkay ang nasapwan sang isa ka 16 anyos nga solterito nga magapangahoy kuntani sa lugar.
Ini ang gilayon naman nga ginreport sa mga opisyales sang Barangay nga amo ang nagcontact sang kapulisan.
Paathag ni Javier nga gilayon man sila nga nagtawag sang operatiba gikan sa Scene of the Crime Operation (SOCO) agud matsekyar ang bangkay.
Ang biktima ang nakabrief lamang sang green samtang nagakulob, naputos sang orange nga panapton ang ulo, kag nakabaklid sa likod ang mga kamot gamit ang plastic straw.
Ini ang nadagdag naman sa ginabanta tatlo tubtob apat ka metros nga pil-as kun sa diin natabunan na sang mga laya nga dahon kag mga sanga ang pang idalum nga bahin sang iya lawas, gani indi matumod ang iya kataason.
Sa karun wala pa matumod kun pila ang samad sang biktima, apang ang orange nga panapton nga nakaputos sa iya ulo ang nagduag pula na bangod sa dugo.
Wala naman sang makita nga pilas sa likod sang biktima.// Ini ang may tattoo sa likod nga “CMDR KOY2x BALDOMAR” samtang may tattoo man sa braso.
Ginalantaw nga pila naman ka adlaw nga napatay ang biktima bangod ini ang nagapanimaho na kag yara na sa advance state of decomposition.
Suno kay Javier, may senior citizen nga namissing sa San Carlos City apang, lamharon pa ang nasapwan nga biktima.
Panawagan ni Javier sa mga may namissing nga himata nga may kaangay nga description, nga makig-angot sa Salvador Benedicto Municipal Police Station agud nga sila ang magiyahan sa pag-identify sang bangkay a punerarya.
