Nakilal-an na ang bangkay nga nasapwan sa kasagingan sa higad sang suba sang Calibago river sa Purok Urban, Barangay Lopez Jaena, Murcia, Negros Occidental.
Ang biktima ang ginkilala kay Ropuerto Untal, residente sa Purok Humayan, Barangay San Miguel, Murcia, Negros Occidental.
Ini ang ginkumpirmar sang hinablos sini nga si Ernesto Valencia, 20 anyos.
Wala naman sang nakita nga foul play sa kamatayon sang biktima kag nagtaliwan ini tuga sang pagkalumos kasunod sang pagsaka sang tubig sa suba sang Sabado.
Ginkumpirmar ni P/Lt. John Paul Tabujara nga nagpatubog sang karbaw ang biktima sa Bago River kaupod ang isa man ka senior citizen nga ginkilala kay Paquito Benedicto, 61 anyos.
Ginpaathag man ni Tabujara nga wala sila sang nabatun nga report nga may nadula kag sang aga nalang sang makabatun sang tawag nga may nasapwan nga bangkay sa Barangay Lopez Jaena.
Sa karun, padayun pa nga ginapangita sang mga kapulisan si Paquito Benedicto.
Naga-apelar naman ang mga himata ni Benedicto sa mga pumuluyo kun may-ara ang mga ini sang impormasyon.
Si Benedicto ang ulihi nga nakita nga nakasuksok sang maroon nga jacket, puti nga t-shirt kag maong nga short.
