Igatugyan na sang gobyerno sang Pilipinas sa Embassy of the Netherlands ang bangkay sang Dutch birdwatcher nga ginkidnap sang Abu Sayyaf Group kag napatay sa tunga sang engkwentro sang mga suldado kag Islamist group kahapon.
Sa interview sang Bombo Radyo kay Armed Forces of the Philippines Public Affairs Office chief Col. Noel Detoyato, indi hungod ang pag-engkwentrohanay nila sang mga miyembro sang ASG sa Patikul, Sulu kahapon sang aga.
Una diri, nakabaton sang impormasyon ang mga suldado nga may armado nga mga persona sa lugar gani ila nga ginrespondehan.
Sang nagluntad na ang encounter, nagtinguha ang Dutch nga si Ewold Horn nga magdalagan gani gintiro ini sang ASG member sa ulo.
Ang bangkay sang Dutch suno kay Detoyato ang natukiban pagkatapos sang bakbakanay, upod ang second wife sang Abu leader nga si Radullan Sahiron nga si Mingayan Sahiron.
Ang biktima ang nabilin nga foreign kidnap victim sang Abu Sayyaf.
Siya ang ginkidnap sang February 1, 2012 samtang yara ini sa baybayon sang Barangay Parangan sa banwa sang Panglima, Sulu, Tawi-tawi.
Bangud wala nagbayad sang ransom ang iya pamilya, nagpabilin ini sa luyo sang ASG members.
